A ñgá bo náa, Jôñgôlô b'áa Kóé bê mbê ámvôé. Bê toó fe ê nlam wóp.
Jôñgôlô a wô'ô wulu anê a a ndembe.
Kóé a a bêt a a kalan ê bilé. Ê mõse wu, ê nde Kóé b'áa Jôñgôlô b'á tée náa b'á ke ê dulu. Bê ñga ke. Bê ñga ke. Bê ñga ke. Ê nde b'á ke kúi ê zàñ ê zen.
Ê nde b'á yêne álên mõt a ñgá ke kõm anê bê wô'ô telé áñgámbá (ñgê ke ndêk).
Ê nde Kóé a a jô mvôé jèé Jôñgôlô náa, "Á mô, bi á zu bo áyá ábím ábeñe meyo' m'a yêne di?"
Ê nde Jôñgôlô a a jô na, "Éké! Ézà meyok! Bí á yeme náa z'á nêe mê?" Kóé a ñgá yalane náa, "Aaah! M'a víni miñwôwòñ."
Ê nde Kóé a ê tabe ê ñkò' álên. Nyê ve ê be'e ézà áñgámbá meyok.
Kóé b'áa Jôñgôlô bê ñga nyú, nê nyúu, nyúu, nyúu. Ê mbe b'á mane nyú ba!
Éyoñ bê mane ya ê nyú, ê nde Jôñgôlô a a jô mvôé jèé na, "Bí mane ya ñhe nyú ézaá meyok. Á ntóo ô beta kê télé ézá áñgámbá ê vôm d'á bê."
Ê nde Kóé a a síli náa, "Ye me ne ñwôwòñ?"
Kóé ve ê nyoñ áñgámbá. A vamê de ê sí. Añgámbá ve ê bôlé.
Ê mbe b'á ke bá. Éyoñ bê tée ya, bê ñga ke. Bê ñga ke. Bê njí ke ôyàp. Bê ñga wô'ô mõt a za'a mvús.
Mõt nyê na, "Á be môo b'á ke. Á be môo b'á ke."
Kóé ve ê yalan náa, "Áyá? Jé é bo ya?"
Mõt nyê na, "M'a yeme náa z'á tê/kê bo ê ma ávále jame dí na? Bê mane me nyú meyok. Bê manê fe me bôé áñgámbá? Zá a a tê/kê me bo ávále jam éte?"
Ê nde Kóé a a ê yalane náa, "Ye wo jêñe mejô ôyàp? Ñgaá õ be'ê mís? Fombô'ô dulu dáñgán! Fombô'ô ê nyí w'á ye yên a ndembe'e. Õ yemê na ê nye a a tê/kê mane nyú wo meyok. A bôé fe añgámbá dôé."
Éyoñ mõt a ñgá yêne Jôñgôlô a ndembe'e, ê nde a ñgá bi Jôñgôlô. Ve ê kõm ê nye bõm an'á ye wu. Jôñgôlô ve ê tab'évól.
Kóé b'áa Jôñgôlô bê ñga ke. Bê ñga ke. Bê ñga ke. Ê nde b'á zu kúi vôm éziñ mõt a ñgá bè betaa afúp fôn. É ñgá bo náa fôn é mane ya ê kôt. Mõt á ñga yañge náa a a ye kólé.
Ê nde Jôñgôlô b'áa Kóé b'á zu kúi èzêzañ afúp.
Ê nde Jôñgôlô a a yóoé anyu. A yôtán na, "Hááááááá!"
Ndúan é ñga so Jôñgôlô ányu. Ndúan ve ê ke ézá afúp fôn. Afúp fôn ve ê ka ndúan. Fôn ése ve ê man ê dík.
Kóé nyê na, "Zá ávále mbíá jam wo ê bo di?"
Jôñgôlô nyê na, "Wo ko jé woñ? Ajô avé é nê wo été?"
Anê bê ñgá tée bê ñga ke.
Ve nanê b'á tyiñelan ákót, ê mõt a mbêe afúp á ñga loene, "Á be môo b'á ke. Á be môo b'á ke. Támê têban. Támê ka teban. Ye mí á tê/kê yên áka'á jam d'á tê/kê boban áfúp dam. B'á tê/kê me mane dí'i ñgúmb'afùp fôn? Ábím ésáé me ñgá wú ê beta afúp fôn dam. Ye mí á tê/kê yên zá a a tê/kê bo ávále mbíá ésáé éte?"
Kóé ve ê yalan náa, "Ane Jôñgôlô. Jôñgôlô ñnye a a tê bo de."
Jôñgôlô nyê na, "Áya, á Kóé. Ye wõ ne jôm èse be náa ma?"
Ê nde Jôñgôlô a a jô mõt náa, "Á mõt. Ye wo ô n'áfúp fôn?"
Mõt nyê na, "Õõwé!"
Ê nde Jôñgôlô a a jô na, "Fombô'ô bíá ve mó. Ê nyí w'a ye yên mó mê toó bivíndi, ê nye a a tê/kê dí'i wo afúp fôn."
Mõt á ñga zu. Kóé á ñga síl mó ê tyia. A túi menden. Á ñga jeñe na mó mê fum ñgê ke náa mê jáñelè èvíndi. Te k'ébaé. Jôñgôlô k'a têle.
Anê mõt a a ê zu fombô mó mê Jôñgôlô. Mó mê ne bifúmúlu. Mõt ve ê lõt. Éyoñ mõt a a ê zu kúi ê be Kóé, ê nde mõt a a jô Kóé na, "Líti'i mó." Ê nde Kóé a a líti mó. Mó ve bivíndi nê viú!
Mõt ve ê zu bõm Kóé. Mbí'ébõm. Ê nde mõt a ñgá ke.
Kóé nyê na, "á Jôñgôlô, zá mbía jam wo tê/kê bo me dí?"
Jôñgôlô nyê na, "Éyoñ wo tê/kê manê nyú ézá meyo' ê lí, õ manê fe bôé ézá áñgámbá, womíén õ yeme náa wo tê/kê bo jam éte vedá wo tê/kê bañe me nyùl. Kê ê nde m'a tê/kê búláne wo."