Ñkóbô Búlu - Ñkaná

Akpwēl A Ñgá Táñ Medu'áne Mé

A ñgá bo náa Akpwēl b'áa Osên be mbe betaa amvôé. Bê mbê fe bê toó ndá jiá, ane bébele ("house mates") àfane dàp.

Éyoñ abe ê beñgon bë lõte ya, Õsên a ñgá biáé bóne bêlál.

Éyoñ mon'étun éyoñ é lõte ya, Akpwēl ve ê mane dí bóne bê Ôsên.

E mvúse ñgon élál, Õsên a ñgá beta bíáé bóne bêlál. An'Ôsên a ñgá vê bónê bé biyõlè. Ê món ôsú, a ñgá yõlè nyê na Mine'e. Ê móne baáa, a ñgá yõlè nyê na Mintene. Ê móne lále, a ñgá yõlè nyê na Abútan.

Õsên a ñgá jô Akpwēl náa, "Ñg'ô betá me dí bón, w'a ye wú." Akpwēl a mbê a jô'õ ê nlêm été na, "Ê mon'ôsên nyi a búní náa a ne jé? Avál avé a a buní náa a ne me wôé?"

An'Ôsên a ñgá ke ésáé áfan.

Éyoñ Õsên á ki ya áfúp, Akpwēl a manê dí ê món a mbê jôé na Mine'e. Éyoñ Õsên á só ya áfúp, a ñgà zu koene náa Akpwēl á mane ya ê dí Mine'e.

An'Õsên a ñgá síli Akpwēl náa, "Mónê wom a ne vé?" Akpwēl a ñgà yalane náa "Ñne wo síli ma ajô te áyá? Me njí yem ê vôm nyo món a né!" ê nde Osen a ñgá beta ke áfúp.

Éyoñ Õsên a ñgá só áfúp, a zú koene náa Akpwēl á mane ya ê dí Mintene. An'Ôsên a ñgá síli Akpwēl náa, "Móne wom mbó' a ne vé?"Akpwēl a ñgá yalane nyê na, "Zá áka'á nsílí wu? Mê njí yem ê vôme móne wõé a né!"

Èyoñ éfê, Õsên a ñgá k'a áfan. Éyoñ a ñgá só, a zú koene Abútan mómo. Akpwēl a mbê a bôõ élé sí, a wóba'ane vián.

An'Õsên a ñgá têbe ê nseñ ê zàñ. Á ñga kóbõ yôp, a yônõk, a bámek, a bo'olõ. A mbê a jô'õ náa, "Wo Akpwēl, ô bôõ élé sí válè ô wóba'ane vián. Ã ñgá wôé mónê wom Mine'e. Õ ñgá wôé móne wom Mintene. Éyoñ jí ô wôé ya mónê wom mbó' Abútan! Me ñgá bo wo jé? Amú jé wo ê bo ma aná?"

Mõt èziñ a mbê a lõtõ'õ válè. A ñgá wô' an'Ôsên a mbê a kóbõ'õ. A ñgá yêne fe Akpwēl é bôõ élé sí. An'á a ñgá vame Akpwēl ê fa. A wôé Akpwēl éte.