A ñgá bo náa, Ká b'áa Zeê bê mbê ámvôé.
Mõs éziñ, Ká a ñgá ke jome mvôé jé Zeê. Ê nde Zeê a ñgá yám ábui bídí: zõm, ñnáme ñgòn, mbõñ, mfíáñ bítêtám. A télé mvôé jèé bidí tawôlô. Bê manê dí. Ká a búláne ê ndá jèé.
Ê mõs õvók, Ká a betá ke ê jome mvôé jèé. Ê nde Zeê a ñgá ke ê nsõm. A wôé ábui bêtít. A manê yám. A señe mvôé jèé Ká abui bídí. Anê bê ñgá dí ä mevak. Ká a búlán ê ndá jèé.
Mõs ôfê, Ká a ñgá ke jome mvôé jèé Zeê. Zeê a yáme ábui bídí: ñnáme ôwõndõ, sá, mfiáñe ndó'o, bikabè. Bê manê dí. Bê ñga láane fe miláñ.
Anê Zeê a ñgá jô mvôé jèé Ká náa, "Èyoñ ése, m'a vê wo jôme yà ê dí. Wo w'a ye vê ma jôm yà ê dí éyoñ évé?"
Bê ñgá ke ôsú ä láane miláñ. Anê Ká a ñgá búlan ê ndá jèé.
Ê môsê wu, Ká a ñgá ke ê nlam èziñ. A kê koene Ñnôme Ñgôé a bo'o bivôé ê nseñ. Ká nyêe Ñnôme Ñgôé na, "Nyo ñgál ä ke a so'o wo ê vôm áse, ä ta ê fe wo áñgôndô.
Anê Ká a ñgá ke yêne Ñgále Ñgôé. Ká nyêe Ñgále Ñgôé na, "Nyo ñnôm ä ke aa so'o wo ê vôm áse, ä jô na ô ne mbía miñgá. Á njí yem amú jé a ñgá lú'ú avál élese miñgá ô né.
Anê Ká a ñgá ke sobõ.
Ê mon'étun éyoñ é ñgá lõt, Ñnôme Ñgôé a ñgá ke aa jêñe Ñgále Ñgôé. Ñgále Ñgôé a ñgá ke a jeñe Ñnôme Ñgôé. Éyoñ bê ñgá tôbáne, bê ve ê táté melúmane. Melúman. Melúman. Melúman. E mvúse melúmane, bê tátée ndùm. Bê ñga juan. Bê ñga juan. Bê ñga juan. A kúi wuá áse a ñgá wôé nyí mbók. Anê bêbaáne bê ñgá mane wú.
Anê Ká a ñgá zu tò'oé mimbim míbaáne. A vê Zeê ñgôé jiá. A nyoñe ñgôé évók asú émíen.