Jõ'ôjô' ñnye a ñgá toó akút. A mbê a bo'o náa, éyoñ Jõ'ôjô'aa ke melám (éyoñ aa ke a jii melám), an'á sòo ñgap tít, aa kap môt áse aa ê koene nyê ê zen. A kap nsá-ákôé. A kap nsé-ñké. A kê kui ê ndá nyiá teke ê fe mvot ê tít.
Ndáa bõt jéè é ñga ye wú aa õzáñ ve ê bõt bevò' ke bê já'á betít.
Ê nde ñhe d'á bo náa, môs éziñ, nyiá a ñgá síli nyê náa, "ábíme mêlám wo lám, y'õ n'étyi te ke wôé tít?"
Nyê na, "Me wô' manê veê bõt."
Anê nyiá a ñgá jô na, "Bo'ò na, súsú'a ya náa w'a ye vê bõte tít, tate'e soo je."
Mõs éziñ, ê nde Jõ'ôjô' a ñgá ke ê melám. A wôé sô. A zúlí je ê be nyiá. Nde nyiá aa jô nye náa, "Salê me ve miñya. Ñgê wo kômbô, õ mane kap tít jôé."
Ê nde Jõ'ôjô' aa ê mane kê ba sô. A nyoñe miñya a kõmê manê vúl ôkáé-kõn. A kê ve nyiá. A manê kap bíbu'a bivòk.
Nyiá Jõ'ôjô'a kõme manê yám bisê'aa miñya. Nyiá a manê bo ê minsúñgá. A manê kõm ê tyiti. A manê tiñeti. A manê tyá'á bikon.
Anê nyiá Jõ'ôjô'aa loene nyê, "á Jõ'ôjôk, awolò ndíán é sò ya. Za'á dí bidí."
Ve nanê Jõ'ôjô' a ñgá tyek. Nyê na, "Eh Ke, á Memá, zá ávále mváé bidí di? Nde ñne tít nyin'é mbê mváé aná?"
Ê nde nyiá á síli nyê na, "á mone wom, A ví'a tatê bo mváé bisêk, ñguma'ane ke ê minsõn? Kê bêtít õ wô'ô kap ê mbê ñhe bê nê na, ê vôm émién aa dañ mváé ñnye õ wô'õ manê kap."
Ê nd'é ñgá bo na éyoñ Jõ'ôjô' aa ê beta so ê melám aa tít, ve nanê mõt aa yé síli nye jôm, a yalán ve náa, "Jõ'ôjô' aa tyêmbe." Ve nanê mõt a yé tòt nye, nyê na, "Jõ'ôjô' aa tyêmbe." Nanê mõt a yé wuá nye nláñ, nyê na, "Jõ'ôjô' aa tyêmbe." A kui a ñgá ke kui ê ndáa nyiá.
A manê suu ê betít ê sí. Nyiá á manê yáme betít. A manê señê Jõ'ôjôk. Jõ'ôjô' á ñga dí. á ñga wô'mváé. Anê Jõ'ôjô'a ñgá jô émién na, "Nde ê nté ôse wú m'a bê me jáñele'e?"
Ajô éte é ne náa bõt b'éziñ b'á nyiñ ényiñ jap ve náa b'á du'ê bõt bevòk. B'á wulú ê bõt bevò' mulu mêlám. Éyoñ mõt a yemeya mêdu'án mêse wo bê õ bo'o nyê, éyoñ aa ê zu bi ê fe'válé ('hálé'), aa zu tyéndé fúlú. W'a ye víáne búni náa mõt atê á ntòo mbía nlêm.
Nde, te wo bo medu'án. Te wo bo bõt abé. Te wo bo mbía nlêm. Amú ñgê mõt a kê yem mõs éziñ, mí a nyê mí ne víáne bo abé.
Espérance Medjo Abeng ñnye a ñgá kañete ájô di Ayoñ Búlu ê môse Beletô 29/08/2019. Akíba á Espérance!
Ñg'ô bilí mam mefë ya ê kõ'õlan, ô ne bía lôme me.