A ñgá bo náa, baa betít a toó áfan. Bê nyiñe mvo'óé.
Ê môs ê wu, Mvom ve ê tée náa a a ke ê nsõm. Á ñga ke a a jêñ bidí. Á ñga ke a a jêñ.. Á ñga ke a a jêñ. A víáne teme náa, a ñgá kolè õbak. Mvom ve ê ku ê betaa èbé été!
A ñgá bômbõ ébé èté melú mêtáan.
Mvom a manê kôt!
É ñgá bo náa, Õkpweñ a ñga lõt áfan, a kel'a a jêñ nja'a. Á ñga ba'aé ñkumb'élé. Ê nde Mvom a wô'ô bidùñ! Anê Mvom a ñgá síli náa, "Zá le? Zá a ê ba'é ñkumb'élé?"
Õkpweñ ve ê yalan náa, "A ne ma Õkpweñ!".
Ê nde Mvom a bôé ñyôn. Nyê na, "Á môo Ôkpweñ. Mê ku ya ébé den á ntóo melú metáan, te ê fe ñgul ya ê bêt. Nyií njá'a ma. Ko ê me èñgôñgól!"
An'Õkpweñ a ñga telé ntyá'án nja'a. A kê tyí'í betaa ayap ntoñ. A zú futi ébé. Ê nde Mvom a ñgá kalane ê ntoñ wú a vame ébé. A zú koene Õkpweñ.
Mvom nyê na, "Á Õkpweñ, ma wô' ábui zaé. Me sê fe ñgul ya ê jíbi. Yêbe'e náa mê di wo!"
Õkpweñ nyê na, "Jía? A Mvom! Mê mane ya ê nyi ê wo váná. Mê vaa ê ya ê wo ébé!"
Õkpweñ a valé mbíl. B'á Mvom bê ñga ke. Bê ñga ke. Bê ñga ke.
Ê nde b'á tôbane Mvìn. Bêse bêbaáne bê ñga táñete ajô.
Mvìn nyê na, "Á Õkpweñ! Mvom ä yiane wo dí amú ä wô' ábui zaé!"
Ê nde Õkpweñ ä síli Mvom náa ye a ne yêbe náa bê ke b'á síli bêtít bevók? Mvom nyê na, "Õõwé".
Ane bê ñgá tée! Õkpweñ ôsú, Mvom ê mvús. Ê nde b'á tôbane Sô. Ê nde Õkpweñ a ê mane táñete ájô. Sô nyê na, "Ôkpweñ, wo yiane yêbe náa Mvom á di wo amú ä wô'ô zaé; á mane ya ê fe kôt!"
Ê nde b'á mane bõmane baa betít áse. Anê bê ñgá tôbane Kúlu. Kúlu a ñgá yên Õkpweñ a a zu a a vebe édúdú!
Kúlu a ñgá síli Õkpweñ náa, "Á Õkpweñ, jé é bo ya?"
Õkpweñ ve ê mane táñete Kúlu ajô.
Étun éyoñ é ñgá bem, Mvom a vámé. Ñkôt an'ébaé!
Kúlu ve ê síli Mvom náa, "Jé fe jí á môõ Mvom?"
Mvom ve ê mane táñete Kúlu an'ájô é ñgá boban.
Kúlu nyê na, "A Õkpweñ! Mvom a yiane fó'ó wo di. Ve ôsúsua náa á di wo, m'a yi náa bía bêse bêlále bí ke ê vôm wo tê/kê vaa ê Mvom ébé!"
Anê bê ñgá tée. Mvom ôsú, Kúlu ézêzàñg, Õkpweñ ê mvús.
Ê nde b'á ke kúi ébé. Betaa ayap ôlé a futú ébé. Kúlu nyê na, "Á Mvom, táme betá nyíin ébé mu!"
Mvom ve ê nyíin ébé. Kúlu nyê na, "Á Õkpweñ, va'áa õlé ébé été."
Õkpweñ ve ê vaa ôlé. Kúlu nyê na, "Kelê tyáé ê nja'a jõé."
Kúlu nyê na "A Mvom, õ ne mbía ètaba'a! Õkpweñ á vaa ê ya ê wo ébé. Á nyií ya ê wo. Èyoñ éte wo jô na wo kômbõ nyê dí!?! Wo táme lí' õ bôo ébé sí wôé!"
Mesuu ya Ñkaná wu mê ne náa "Bikálá' bí n'abé! Ñgê mõt a bo wo mváé, te wo búlane nyê ä abé!"