A ñgá bo náa, Ènyônyóñ a mbê a toó ê jàl dé, ê mendím été.
Môs éziñ, ê nde Ènyônyóñ a a bíáé átyì ê mendím èté. Atyì é bo ê nsóñ. Nsóñ ôte ô bôlé. Ô zu bo ê bet'ènyônyóñ.
Ê nde Mon-Ényônyóñ a ñgá kúi ê mendím. A ñga ke a a têbe ê mendím ê yôp. Á ñga yêle.
Môs éziñ, Mon-Ényônyóñ a ñgá jô nyiá na, "M'a kômbõ táme ke m'a yêne nseñ. Me ke m'a yáé."
Ê nde Nyiá-Ènyônyóñ a a jô món na, "Áakia! Á móne wom. Õ tabe'e ntyêl"
Mon-Ényônyóñ a ñgá yalane nyiá na, "Aya! Ye m'a ye káñge me toó ve vôme wuá?"
Ê nde Nyiá-Ènyônyóñ a a jô móne na, "Nálé! Á móne wom. Kelêk!"
Binyônyoñ bí á dañe wul'aalú.
Ê nde món a a tée. A ñga ke a a yêle. A ñga ke a a yêle. A ñga k'a a yêle. A ñga k'a a yêle.
Mon-Ényônyóñ a ñgá teme náa ve nan'á kúi vôm èziñ, mõt a kutê fás. Ve nan'á kúi vôm èziñ, mõt a bíbí abè. Nan'á kúi vôm, mõt a bíbí wo ê mfin. B'á ke b'á kop nyê. A kel'a ndêñe nalé, ne ndêñe, ndêñe, ndêñe. Ñgúmb'álú. Nté ôse wú, nlêm ô tyelê nyiá yôp.
Éyoñe tyé é ñga zu j'a lendé, ê nde Mon-Ényônyóñ a ñgá búlan ê ndá jèé. A kê koene nyiá.
Nanê nyiá a ñgá yênê nye, nyiá ve ê wúbane nyê. Nyiá nyê na, "E'! Akíb'amú ô só ya. M'a bê me ñga ye wú a ñyôn. M'a bê me koo woñ náa èko-ziñ bê wôé ya wo."
Mon-Ényônyóñ a ñgá yalane nyiá na, "B'á wôé ma aa jé? Ye b'á wôé ê wéè?"
Nyiá-Enyônyóñ nyêe móne na, "Lá'ane ñhe ma! Wo tê/kê bo áyá wôé?"
Mon-Ényônyóñ nyê na, "M'a tê/kê ke m'a wulu. Bôt b'á tê/kê nye'ê ma abui. Avále dá b'á tê/kê líti náa b'á nye'e ma é ne náa b'á bê bê kut mefás. B'á bê fe bê kute mebè! B'á bê fe bê kut miñkuk. Môt ás'a a bê á jô'ô ve náa, 'Maá me nêe nyê.'"
Ê nde nyiá a ê tabe. Á ñga kúli míli'i mís. Á ñga yôn. Nyê na, "A móne wom, tabe'e ne sée! E bôt bêse b'á bê bê kute mefáse le, bê njí kute mefás na b'á wô'ô wo mváé. Awú dôé ê le. Bêse b'á bê bê yii wo ve awú. Teke ve môt a a bê a wô'ô wo mváé."
Ane Mon-Ényônyóñ a ñgá tabe nê mieñ.