A ñgá bo náa Akpwēl, Kóé, Ñgui, ä Ñgúñ bê bênyin bê mbê bê toó nlam éziñ, tít ése é toó ndá jé, é toó fe étám.
Ê môs wu, Akpwēl, Kóé, Ñgui, ä Ñgúñ bê ñgá tôban e vôm éziñ. Be ñga láane minláñ.
Ñgui nyê na, "Anê m'a ye ke kui ndá dên, teke mendím ya ê wòban amú me toó étám".
Akpwēl nyê na, "Ke ja'a ma! Ye náa me ne suan ndá me koene náa b'á te yám ma jôme ya ê dí?"
Ñgúñ nye'e náa, "Wo sombo'ô bilí bilí vôm ya ê bômbô ñgô'é nyi. E ndá jam ôbaé ô ñga mane ku."
Ê nde Kóé a ñgá jô be náa, "E bíá benyin bí ne va, teke mvoláne éziñ ô ne bía mendá. Ñga bí ne jíbi tabe vôme ñge ke ndá jiá, ndemben bí ne volan?" Betít bevò'ò be ñgá yene jam éte mváé. Ane bê bênyin be ñgá tyi'na b'á zu tabe ndá jiá.
Mfá'á vôm bê nê tabe, be ñgá top beta mbil ô mbe bet'élé éziñ ê sí. Élé éte é mbê ê fefêl ôsõé.
Eyoñ Akpwēl, Kóé, Ñgui, ä Ñgúñ bê ñgá suan ê mféfé ndá jap, be ñgá tabe sí náa bê bôndée fek avál avé b'á zu nyiñ. Be ñgá tabe ékôán éte ñgúmb'alú.
Nde Akpwēl a ñgá jô na, "Ê ván'é bo náa te ke ñkóbô éziñ ämôs. E nyí ase aá ye kob'ämôs ä ye jêñ bía awú."
Anê Kóé a ñgá jô ná, "Nál'a ne mbamb'ajô. Wo bele. Bí á ye fo'o bo teke kobô ämôs. Ê nlam woñgán ôse w'á ye bo ne mieñ ämôs."
ábe melu ä bêñgon be ñgá lôt, nlam ô mbê évôl nê mieñ! ämôs, mõs ôse.
Mõs éziñ, Akpwēl a mbê a toó ê mbé ya ndá jap.
Kóé a mbê a toó ê zañe ndá.
Ñgui a mbê a toó ê nd'átum. Mbôle ndá jap é mbê é bilí mbil ê fálá'yôp, vián ô mbê ô nyíin ê nd'été. Nalé Ñgui a mbê á woba'ane vián éyoñ a bôo ê sí.
Ñgúñ ke a ñgá lôñ dumbá'á ê ndá yôp.
Ê mvús abe beñgon, ébúma y'élé é ñgá tôlôbô. Eyoñ Ñgúñ a ñgá yêne ébúma éte, an'a ñgá wô'abui mevak. Ane Ñgúñ a ñgá kolé ébumá. A ñga dí. Eyoñ a mbê á já'ak, a ñga bo abui biduñ.
Ane Akpwēl a ñgá jô Kóé na, "A Kóé, kate Ñgúñ náa á dip anyu. Awú é za so e bebíá."
Môs ôte, mone ndôman a mbê a lôtõ'õ valé. Nanê a ñgá wô'éduñ Ñgúñ a mbê a bo'ok, nde a ñgá nyoñ tòloò wé ä õkôk. A sôñé. A wuá. An'á ñgá lúme Ñgúñ ôkôk. Ane Ñgúñ a ñgá ku.
Eyoñ Ñgúñ a mbê a kpwa'ak, nyúl jèé é ñgá tômetane Ñgui ê vôm a mbê a toõ átum a woba'ane vián. Anê Ñgui a ñgá síli náa, "Za ä bíbi ma?"
Ane mone ndôman a ñgá beta sôñ tòloò. A wuá. A lúme Ñgui. Ane Ñgúñ báa Ñgui bê mbê bê kpwa'ak, bê ve ê ku Kóé ê mvús.
Eyoñ mone ndôman a ñgá yene Kóé, a sôñe tòloò. A wuá. A lúme Kóé. Ane bê bêlále be ñgá ku ê mbé ndá. Be wúí.
Eyoñ mone ndôman a ñgá ke náa ä ke to'oé bêtít a ñgá wôé, nyê ve ê yên Akpwēl. An'a ñgá tyí'Akpwēl éñgoñ.
Eyoñ Akpwēl a mbê a wo'ok, a ñgá jô na, "Ñgaá me ñgá kôme kate míá náa ñge mí boò teke tabe nê mieñ! ämôs, awú d'á ye so ê be bía? Awú bí á wú dên diná é ne zôsõô.
Ane mone ndôman a ñgá to'oé mimbim betít a kele miê ê nlam.