Bevámbá bê njí ke bê bê láñe mimbú anê mintáñán. Bevámbá bê mbê bê dôme náa mbú w'á tátè aa èsep; èsep ke j'á tátè ê ñgon "December/Décembre". Anê ésep j'á ke man ê memanê mê ñgone baáa. Ê nyíli a ne betaa èsep, ñgê ke ñgul èsep.
Éyoñ èsep é mane ya, èyoñ éte abõ' ásíl j'á tátè. Asíl é ne mon ábõ' ê mveñ è nê tyítyóé. Ê nyíli a ne mon ésep. Asíl é wô'õ tátè ê memanê mê ñgone baáa ñgê ke ê ñgone lále akêkúi ê memanê mê ñgone táne.
Éyoñ asíl é mane ya, èyoñ éte abõ' ôyõn d'á tátè, ê memanê mê ñgone táne ñgê ke átáta'á ñgone samane. Õyõn ôyõn é ne monê ñkõ (biñgá b'èziñ bê wô'õ ke álôk ôyõn, bê wô'õ kê lô'ô bivêñgê). Õyõn w'á man ê mfá'á yà ñgone muam.
Éyoñ õyõn ô mane ya, èyoñ éte ñgon sezêbe j'a só. Ñgon sezêbe j'a tátè ê ñgone muam, akêkúi éyoñ mveñ j'a nóñ ábui. B'á loene abõ' éte náa akáp. Akáp éte d'á; tátè ê ñgon èbùl akêkúi ê ñgon awôõm aa jíá. Éyoñ ñgon awôõm aa jíá j'a ê ke man, èsep é betá tátè. Mbú ô betá tátè.
Bifíá
asíl (abui: mesíl): short rainy season/courte saison de pluies
e dôm: to consider/considérer