A ñgá bo náa, Ényônyóñ a mbê a toó ê jalê dé, ê mendím été.
Môs éziñ, ê nde Ényônyóñ ä biáé átyi ê mendím été. Atyi é bo nsòñ. Nsòñ ôte ô bôlé. Ô zu boò bet'ényônyóñ.
Ê nde Mon Ényônyóñ a ñgá kúi ê mendím. A ñga ke a têbe ê mendím ê yôp. á ñga yêle.
Môs éziñ, Mon Ényônyóñ a ñgá jô nyiá na, "M'a kômbõ táme ke m'a yêne nseñ. Me ke m'a yáé."
Ê nde Nyiá Ényônyóñ ä jô mone na, "Aakia, a mone wom. Õ tabe'e ntyêl"
Mon Ényônyóñ a ñgá yalane nyiá na, "Aya! Ye m'a ye kañge me toò ve vôme wuá?"
Ê nde Nyiá Ényônyóñ a jô mone na, "Nálé, á mòne wom. Kelêk!"
Ê nde mon ä tée. A ñga ke ä yêle. A ñga ke ä yêle. Binyônyoñ bí á dañe wul'älú. A ñga k'ä yêle. A ñga k'ä yêle.
Mon'Ényônyóñ a ñgá teme náa ve nan'á kúi vôm èziñ, mõt a kutê fás. Ve nan'á kúi vôm èziñ, mõt a bíbí abè. Nan'á kúi vôm, mõt a bíbí wo ê mfin. B'á ke b'á kop nyê. A kel'a ndêñe nalé, ne ndêñe, ndêñe, ndêñe. Ñgúmb'álú. Nté ôse wú, nlêm ô tyelê nyiá yôp.
Éyoñe tyé é ñga zu j'a lendé, ê nde Mon-Ényônyóñ a ñgá búlan ê ndá a kê koene nyiá. Nanê nyiá a ñgá yênê nye ve ê wúbane nyê. Nyiá nyê na, “E'! Akíb'amú ô so ya. M'a bê me ñga ye wú a ñyôn me koo woñ náa èko-ziñ bê wôé ya wo."
Mon-Ényônyóñ a ñgá yalane nyiá na, "B'á wôé ma ä jé? Ye b'á wôé ê wéè?"
Nyiá-Enyônyóñ nyêe mone na, "Lá'ane ñhe ma! Wo te/ke bo áyá wôé?"
Mon-Ényônyóñ nyê na, “M'a tê/kê ke m'a wulu. Bôt b'á tê/kê nye'e ma abui. Avále dá b'á tê/kê líti náa b'á nye'e ma é ne náa b'á bê bê kut mefás. B'á bê fe bê kute mebè! B'á bê fe bê kut miñkuk. Môt ás'ä bê á jô'ô ve náa maá me nêe nyê."
Ê nde nyiá ä ê tabe. á ñga kúli míli'i mís. á ñga yôn. Nyê na, "A mone wom, tabe'e ne sée! E bôt bêse b'á bê bê kute mefáse le, bê njí kute mefás na b'á wô'ô wo mváé. Awú dôé ê le. Bêse b'á bê bê yii wo ve awú. Teke ve môt ä bê a wô'ô wo mváé."
Ane Mon-Ényônyóñ a ñgá tabe nê mieñ.